✨ مقدمة

فيه ظاهرة جديدة اسمها vibe coding، يعني مثلاً تفتح Cursor وتطلب منه يكتب لك كود وانت قاعد بتتفرج وبتشرب قهوتك… الحقيقة إن النتيجة دي في الغالب بتبقى سيئة جداً، مافيش حاجه من غير عرق وصبر.

الـ Cursor ده مش ساحر، لكن تقدر تعتبره طفل عبقري… محتاج حد يفهمه ويوجّهه ويعرف يطلّع منه نتايج حقيقية… ده اللي هاتكلم عنه في المقالة دي.

👶 التعامل مع طفل عبقري

أداة Cursor ممكن تدهشك بكود ممتاز، وبعد دقيقة يكتب حاجة تانية ملهاش أي علاقة باللي كنت بتتكلم فيه. بينسى بسرعة وساعات بيعيد نفس الكلام، وساعات بيطلع بأسئلة غريبة كأنه نسي كل اللي اتقال قبل كده. ده مش عيب — هو فعلاً عبقري بس محتاج مجهود عشان يفهم ويفضل فاهم ويشتغل صح.

التعامل معاه مهارة لوحدها، فيها جزء فني تقني وجزء تِربية وجزء هندسة أعصاب 😅.

📜 القواعد أولاً (Rules & Context)

أول وأهم حاجة: حط قواعد واضحة من البداية. Cursor بيسمح لك تحط قواعد للمشروع في ملفات mdc في مسار .cursor/rules. اعمل لك ملف اسمه مثلاً workflow.mdc أو project-guide.mdc أو أكتر من ملف… وخلّي الـ AI يساعدك في كتابتهم.

اكتب فيهم كل القواعد اللي انت محتاجها: الـ tone اللي تحب يرد بيه، الأسلوب اللي يتكتب بيه الكود، الاستاك اللي بتشتغل عليه، الحاجات الممنوعة أو اللي لازم يعملها دايمًا، التست ازاي وبإيه، يعمل Pull Request وللا لأ، يسأل لما يحس إنه مش متأكد… الخ.

ما تنساش كمان تعمل توثيق للمشروع في صورة ملفات md مثلاً وحطها في مجلد docs… الملفات دي هاتكون الـ metadata اللي هاتحتاجها لما تكلّم الـ agent… مثلاً ملف فيه شرح المشروع، واحد تاني لتقسيم المهام، واحد تالت فيه المشاكل اللي بتواجهك دلوقتي… الخ، وكتر وكسّر على قد ما تقدر.

الملفات دي هاتبقى العقد بينك وبينه — هي المرجع وهي اللي هاتخليه يفتكر السياق لما تفتح مشروعك بعد كده، وهي اللي هاتحافظ على التنظيم والظبط والربط… بس خد بالك: لازم تحافظ على الملفات دي محدثة طول الوقت لمصلحتك انت.

🧩 اكسر المهام لأصغر ما يمكن

ما تديش Cursor “مشروع” — إدّيه “تاسك”، وما تديهوش “تاسك” — إدّيه “جزء من التاسك”. كل ما تقسم المهمة أكتر وتصغّرها أكتر، كل ما تقلل احتمالية الهلوسة، وكل ما تبقى انت فاهم الدنيا رايحة فين… ده الفرق بين الشرب من كباية ميه، والشرب من خرطوم المطافي، انت بتصغّر المهام عشان انت تقدر تفضل متابع ومسيطر.

ابدأ بتحليل واضح واشرح له الأول… اسأله “فهمت؟” وشوف الرد… لو الرد واثق ومتماسك — تمام كمّل… لو حاسس إن فيه تردد أو كلام عام، اعرف إنه لسه مش فاهم كويس… وخد بالك إن الـ AI بيبقى واثق أوي حتى وهو بيخطرف.

⚙️ اختار الموديل بعقل

اختيار الموديل بتاع الـ Agent بيفرق جدًا، فيه موديلات أذكى وأدق لكن طبعاً هاتكلفك أكتر. لو شغلك بـ Cursor هايبقى كتير يبقى لازم توازن بين الجودة والتكلفة… مش كل تاسك محتاج Claude-4.5 مثلًا، فيه حاجات ممكن تتعمل بموديلات أخف وأوفر… وماتنساش الموديل التقيلة دي عند اللزوم، في التاسكات المعقدة، أو لما المودل الصغير يعك الدنيا، ساعتها لازم تكلم الاسطى الكبير.

🤝 علاقتك مع Cursor

العلاقة دي مش هاتبقى جلسة واحدة، دي رحلة… Cursor مش هايتطور معاك زينا كبشر — يعني كل تاسك كأنها أول مرة تعرفوا بعض فيها… هايبقى فيه أخطاء وعك كتير، وهتعيدوا نفس الحوار عشروميت مرة… بس لما تاخد الخِبرة هتكتشف إن العملية كلها شبه التنقيب عن الدهب: متعبة بس تستاهل… فخد بالك كويس من إنك تدمنه 😄.

💻 حافظ على مهارتك وحرفتك

ودي في رأيي أهم نقطة: وقف Cursor كل شوية واكتب كود بإيديك… ما تسيبش مهاراتك تضعف، ماتعتمدش عليه في كل كبيرة وصغيرة… خليك دايمًا أعلى من الكرف، لأن المستقبل شكله مشرق ومهبّب في نفس الوقت 😂. اللي هايكسل ويعتمد على الذكاء الصناعي هيلاقي نفسه بعد شوية بيتفرج بس.

🏁 الخلاصة

أداة Cursor AI أداة عظيمة بس محتاجه تعامل خاص… هو مش زميلك في الشغل، هو طفل شاطر لازم تربيه… لو عرفت تمسك العصاية من النص بين “التحكم” و“الاستفادة” هتكتشف إنك بتشتغل أسرع وأذكى.

بس متنساش: اللي بيفرق بين المستخدم العادي والمحترف هو مش إن عندك Cursor، هو إزاي بتتعامل معاه وتستفيد بيه.