في الفترة الأخيرة وأثناء رحلة البحث عن عمل، لاحظت حاجة استغربتها جدًا: ليه كتير من الشركات بتركز بشكل حصري على الخبرة في أدوات معينة ويتجاهلوا القدرات التانية عند المتقدم؟ يعني بتلاقيهم بيطلبوا شخص عنده خبرة عميقة في أداة محددة، شهادة كمان فيها يكون أفضل وأفضل، رغم أن الأدوات دي بتتغير كل يوم. النهارده فيه أداة، بكرة هيبقى فيه واحدة أحسن، وبعديها واحدة تانية. كمان خبرتك في أداة بعينها مش معناه إنك بتعرف تحل مشاكل وتقدم حلول مهمة للشركة، خبرتك في أداة معينة مش قيمتك الوحيدة. يبقى السؤال: ليه التركيز مش على قدرة الشخص إنه يتعلم ويتأقلم بسرعة بدل ما يكون مجرد مستخدم جيد لأداة معينة؟

النقطة اللي بتقودنا لسؤال أهم: الشركة بتحتاج إيه بالضبط؟ هل هي محتاجة مكنة بإيدين ورجلين، وللا “دماغ” تفكر؟ الحقيقة وللأسف إن شركات كتيرة مش بتركز على القدرات العقلية والإبداعية للمتقدم، لكن تركيز أكبر على خبرات بعينها. مع إن المبرمج مش مجرد ماكينة تكتب كود؛ دوره أكبر وأعمق من كده، دوره إنه يفكر، يبتكر، يطور الشركة ويخدم عملائها.

المشكلة مع الطبقات الكتيرة داخل الشركات

وجود طبقات كتيرة أو “layers” داخل الشركة نفسها ليه دور أساسي في التركيز على الأدوات أكتر منه على المهارات، وده بيخلق مشكلة كبيرة أثناء التوظيف. كل تقريباً المرات اللي قدمت فيها كان لازم أعدي على الـ HR، الـ Recruitment، وكام قسم تانيين، وفي الوسط أعدي على مدراء IT وDelivery Managers وغيرهم. ناس كتير من دول أصلاً مش متخصصين في المجال، لكنهم حافظين شوية نقاط مطلوبة بالحرف. النتيجة؟ تركيز مفرط على المهارات الصلبة زي الأدوات، مع تجاهل الجوانب الفكرية والشخصية للمتقدم.

تكلفة تعيين الشخص الخطأ

فيه اعتقاد سائد إن تكلفة تعيين شخص غير كفء أكبر من خسارة فرصة تعيين شخص جيد. علشان كده بتلاقي الطبقات والإجراءات زادت جدًا في مقابلات العمل، كذا انترفيو عملتهم الفترة الأخيرة كانوا عبارة عن 5 مراحل، كل مرحلة بتقابل وحش مختلف. كل ده في محاولة من الشركات لتقليل فرص إن يتم تعيين شخص غير كفء. لكن الحقيقة، حتى مع كل الإجراءات دي، لو الشخص بيعرف “يلعب اللعبة”، الشركة هاتلبس في حد مش كويس، رغم كل محاولاتهم لتجنب ده، لأن في الآخر المقابلات أو الانترفيوهات ما هي إلا عملية مهارية وممارسة ممكن أي حد يكتسبها ويستغلها.

غياب التركيز على التفكير والتواصل

إهمال التركيز على طريقة التفكير والقدرات الأخرى لدى المتقدم من النقط المهمة اللي كانت واضحة. المقابلات كتير بتركز على الأدوات وخبرات محددة، لكنها مش بتدي وزن كافي للمهارات التانية المهمة، زي مثلاً ترتيب الأفكار والتسلسل المنطقي في اتخاذ القرارات. وكمان مهارات التواصل، زي إزاي الشخص يختصر ويبلور أفكاره ويعبر عنها بشكل واضح ومنظم. ده غير إن دور المبرمج مش بس كتابة الكود، وإن كان ده دوره نظرياً، لكن دوره الأهم إنه يفكر من منظور العميل والشركة ويساهم في تحسين البزنس بشكل عام.

نسينا مهارات البحث

زمان، مش زمان أوي يعني، كان المبرمج المميز عنده مهارة قوية في البحث والتنقيب عن حلول، سواء كانت على Google أوStackOverflow أو غيرهم. دلوقتي الأدوات اتطورت ودخلت أدوات الذكاء الاصطناعي AI زي ChatGPT، اللي خلت مهارة كتابة Prompt مظبوط مهارة حيوية لأي مبرمج. المبرمج الشاطر النهارده مش بس بيعرف يدور، لكنه كمان بيعرف يستغل الأدوات دي بكفاءة علشان ينجز شغل أكتر في وقت أقل.

الغريب إن الشركات لسه مش بتدي أهمية كافية للمهارة دي في المقابلات، مع إنها بقت أساسية، خاصة في وقت بيتم فيه تقليل العمالة وتوزيع شغل أكتر على فرق أصغر. حتى الشركات اللي بتحط قيود تمنع استخدام الذكاء الاصطناعي بشكل مباشر، المبرمج الشاطر يقدر يستفيد من الأدوات دي بشكل آمن وبدون ما يضر شركته أو يكسر أي لوايح. الشركات لازم تعيد تفكيرها وتخرج من عباءة البحث عن خبرات محددة، وتبتدي تبص على مهارات الذكاء الاصطناعي كجزء أساسي من تقييم المبرمجين.

أسئلة أعجبتني

رغم كل ده، فيه أسئلة عدت عليّ في بعض المقابلات كانت ممتازة، وبتظهر فعلاً إن الشركة بتفكر في المبرمج أكتر من كونه مكنة إنتاج كود. دي بعضهم:

• في دقيقتين، لخص مشروع اشتغلت عليه وكنت فخور بيه وبنتايجه.
• اعمل تصميم design لخاصية معينة واشرح ليه اخترت وقررت تعمله كده.
• إزاي تخلي كذا نظام يتواصلوا مع بعض، وما هي القيود وتفضيلاتك لكل طريقة؟
• إزاي تزبط الـ Observability لنظامك؟ وازاي تخليه Resilient؟
• إيه خطتك للتعامل مع وصيانة legacy code وترقيته لتكنولوجيات أحدث؟
• توازن ازاي بين الصيانة والترقية وبين تقديم وتطوير خصايص جديدة مطلوبة؟

الأسئلة دي حسيت إنها فعلاً بتقيم الشخص بشكل عملي ومنطقي، وبتساعد كمان المتقدم يفكر خارج دوره الكلاسيكي ويفكر أكتر كجزء من الشركة. غير إن الأسئلة دي بتديني انطباع جيد عن الشركة، سواءاً الأسئلة دي أو أي أسئلة شبيهة بتختبر مهاراتك وطريقة تفكيرك.

الخلاصة

الشركات محتاجة توازن بين العنصر البشري وقدراته المختلفة وبين المتطلبات الفنية الصلبة زي الأدوات والخبرات. التركيز على العقلية والقدرة على التطور والإبداع هو المفتاح لإنجاح أي فريق. شكرًا للشركات اللي بتقدر تفكر بالشكل ده، وللشركات التانية، أتمنى إنها تعيد النظر.