زميل معايا في التيم خلاص سايب الشركة وهايشتغل فريلانسر، فمحتاج يعمل شركة عشان العميل أو الشركة اللي هاتشغله محتاجه رقم السجل التجاري بتاعه … تابعت معاه الإجراءات وقلت أكتب لكم ملخص عنه … الموضوع كان أسهل من شكة الدبوس، عمار يا هولندا.

ليه شركة

باختصار عشان علاقة البزنس تكون قانونية بين الطرفين، يا إما تكون موظف في الشركة أو تكون متعاقد Contractor، وفي الحالة الأخيرة دي لازم يكون ليك شكل قانوني في صورة شركة … وكمان وجود شركة للمتعاقد أو موفر الخدمة مهمة للعميل لأنه عن طريق علاقة البزنس دي يقدر يطلب من الضرايب ترجع له ضريبة القيمة المضافة VAT - بالهولندي BTW، اللي دفعها في فاتورة الخدمة.

كمان وجود شركة بيوفر مزايا مختلفة لصاحب الشركة وبالذات لو كان فريلانسر أو رائد أعمال Entrepreneur، زي مثلاً إنه يقدر يخصم مصاريف تشغيل من الضرايب، على عكس الموظف مثلاً … على سبيل المثال جزء من مصاريف العربية لأنه بيستخدمها جزئياً في الشغل، وجزء من إيجار البيت لأنه بيستخدم جزء منه مثلاً في أداء عمله … وكمان زي ما قلنا فوق يقدر يسترجع الـ VAT اللي دفعه على مشتروات تخص البزنس، حاجه زي تمن كمبيوتر أو موبايل، والحاجات دي بيبقى الـ VAT بتاعها 21%، وده مبلغ مش بطال … والقانون بينظم الموضوع ده بشكل واضح.

مزايا تانية لأصحاب الشركات بتبقى في صورة إعفاءات ضريبية في أول كام سنة لو تنطبق عليك شروط معينة، ودي مساهمة من الحكومة في تيسير الحال على اللي لسه بيبتدوا شركاتهم … ولو الشركة دخلها صغير، بتاخد إعفاءات أكتر تخص فئة الشركات الصغيرة.

ليه موظف

فيه مزايا تانية بتبقى للموظف على عكس أصحاب الشركات، زي مثلاً التأمينات والتقاعد، الشركة هي اللي بتدفع كل أو معظم مبالغ التأمينات دي عن موظفيها … غير الأجازات المدفوعة اللي بتبقى للموظف في السنة، صاحب الشركة يقدر ياخد أجازات طبعاً بس كله على حسابه … غير طبعاً راحة البال، الموظف مش محتاج يدوّر على عملاء ويسوّق لنفسه، عكس الفريلانسر مثلاً … وكمان لو حصلت أضرار لا قدر الله لعميل، الشركة هي اللي بتبقى مسؤولة قدام القانون، مش الموظف … وأخيراً الشركة فيها وجع دماغ من ناحية إمساك الدفاتر Bookkeeping والفواتير والتحصيل الخ.

أنواع الشركات

أشهر نوعين في هولندا لشركات الأفراد هي ZZP وBV … النوع الأول ZZP أو أقرب ترجمة ليها هي شركة الفرد الواحد، ودي أشهر نوع وأكترهم انتشاراً … ودي بتبقى أشبه بعلاقة زواج بين صاحب الشركة وشركته، صاحب الشركة مسؤول قدام القانون عن أي أضرار تخص الغير، والقانون هاياخد التعويض من شركتك وكمان من مالك الخاص … ميزتها إنها سهلة أوي ومش بتحتاج رأسمال أو حساب بزنس بنكي خاص، الحساب الشخصي لصاحب الشركة كفاية، وإمساك الدفاتر Bookkeeping فيها والمحاسبة والضرايب والأعمال الإدارية Administration أسهل كتير من الأنواع التانية.

النوع التاني BV ودي أقرب ترجمة ليها شركة أفراد ذات مسؤولية محدودة .. ماليش معرفة كتيرة بيها، اللي أعرفه عنها كفرق عن اللي فوق إنك محتاج يكون معاك 5000 يورو رأسمال، وليها حساب بنكي مستقل عنك لأنها قدام القانون ليها كينونة مستقلة، وبالتالي صاحب/أصحاب الشركة مسؤوليتهم محدودة عن الأضرار والخساير، بس في حالة لو كانت الأضرار ناتجة عن تقصيرهم أو أخطاء متعمدة … دفاترها وحساباتها وإدارتها أصعب ومعقدة عن الأولانية.

اول خطوة

أي حد يقدر يفتح شركة أفراد في هولندا حتى لو مش معاه الجنسية، طالما معاه إقامة قانونية ومستوفي الشروط … في حالة زميلي لأنه هايبقى مبرمج فريلانس فالموضوع سهل جداً، لكن في حالات تانية وفي قطاعات تانية ممكن يطلبوا رخص معينة أو توريلهم انك عضو في نقابة معينة.

زميلي فتح الموقع الإليكتروني للغرفة التجارية الهولندية KVK، والصفحة الرئيسية بتشرح حاجات عامة ومنها لنك لإنشاء شركتك … في الصفحة دي زميلي ملى فورم كبيرة فيها بيانات مختلفة زي: اسم الشركة، تاريخ الإنشاء وبداية النشاط، نشاط الشركة والغرض منها … عنوان الشركة - ممكن يكون نفس عنوان السكن بتاع صاحب الشركة، هل تحب تخفي عنوان الشركة - في حالة مثلاً كان هو نفس عنوان السكن … البريد الإليكتروني للشركة، ولو فيه موقع أونلاين ليها - عشان يتسجل مع شركتك ويبقى من أصولك وماحدّش يقدر ياخده بعد كده … بالإضافة لبيانات صاحب الشركة واللي الموقع أوتوماتيكي بيجيبها من الحكومة وانت بتسجل دخول من خدمة DigiD.

جزء من البيانات المطلوبة إنك كمان تحدّد ميعاد مقابلة في مكتب من مكاتب الـ KvK اللي في كل حتة، زميلي اختار في الموقع فرع أمستردام لأنه أقرب له واختار اليوم والوقت المناسب ليه واللي كان بعد أسبوع من كتابة الفورم … مكتوب إن الميعاد ده غرضه مراجعة الأوراق ودفع الرسوم، وتستلم رقم السجل التجاري بتاعك في نفس اللحظة.

بعد ما زميلي ملى الفورم وكمّل كل البيانات، اللي أخدت حوالي 10 دقايق منه، ضغط على زر الإرسال … وبعديها رسالة نجاح وإيميل اتبعت فيه التأكيد وميعاد المقابلة وعنوانها … وبعض النقط اللي محتاج ياخد باله منها، زي إنه ييجي في الميعاد ويجيب معاه إثبات شخصية زي بطاقة أو رخصة سواقة أو باسبوور … وكام لنك لو عاوز يغير الميعاد أو يلغيه خالص.

المقابلة

في الميعاد كان زميلي هناك، بينتظر في مكان للانتظار وبعد شوية موظف بينادي عليه عشان ياخده ويروحوا يقعدوا في مكتب … كل حاجه بالإنجليزي أو الهولندي، حسب تفضيلك … الموظف بيراجع معاه البيانات وبيتأكد من هويته، وبيقترح عليه تصحيح بيانات معينة زي مثلاً اسم الشركة لو كان موجود أو شبه حاجه موجودة … وبيظبط الفقرات اللي بتتكلم عن نشاط الشركة عشان تبقى واضحة ومتطابقة مع تصنيف الأنشطة التجارية في القانون الهولندي … وبيجاوب طبعاً على أي اسئلة وبيدي نصايح عشان البزنس يمشي بسلاسة.

المقابلة بتاخد حوالي 10 دقايق، وفي اخرها زميلي بيمضي ع العقد وبيدفع الرسوم، حوالي 50 يورو - متوسط الدخل الشهري هنا 2000 يورو … وألف مبروك بقى عندك شركة بسجل تجاري وملف ضريبي.

بعد ما الموظف يعمل التأكيد والمراجعة ويفعّل الشركة، فوراً بيجي لك إيميل من الغرفة التجارية فيه لستة كبيرة من المقالات اللي بتساعدك تاخد أولى خطواتك … ازاي تعمل فواتير قانونية، ازاي تلاقي محاسب يساعدك، إيه الخصومات الضريبية اللي ممكن تستفيد بيها، إيه التأمينات الإجبارية والاختيارية المهمة، ازاي تحسب سعر الساعة بتاعتك، ازاي تلاقي عملاء وتعمل تسويق كويس لنفسك، وغيرها كتير وكتير … وكله بالإنجليزي والهولندي.

وبعدين

بعد كده بقى كل ما تتعاقد مع عميل، هاتكتب رقم السجل التجاري بتاعك في العقد، وآخر كل شهر هاتبعت للعميل فاتورة فيها بيانات كاملة، وكل ربع سنة - 3 شهور - هاتعمل الضرايب بتاعك … الموضوع سهل كيك وده اللي المفروض يبقى دايماً الحال لأي دولة عاوزه تجذب استثمارات، إنها تسهّل كل حاجه على أيّ حد عاوز يعمل بزنس … شركة في 10 دقايق.