بيجيلي رسايل ع الخاص كتير من بعض الأصدقاء تخص رأيي في سيفيهاتهم … ولأن الموضوع مفيد للجميع، قلت أكتب كام نصيحة تركّز على أهم النقط في السي في CV - resume بتاعك، وبالذات لو انت في مجال البرمجة والـIT … طبعاً باقي المجالات ممكن تستفيد هي كمان، بس أكيد هايبقى فيه بعض الفروقات بين المجالات، وكل واحد أدرى بأهل كاره.

معلوماتك الأساسية

أول حاجه تتكتب في السي في بتاعك لازم تكون اسمك، وتليفونك، وإيميلك … وممكن بس مش مهم أوي تحط لنك لحساب لنكدإن بتاعك و/أو لنك للجيتهوب Github بتاعك … ويكون أحسن كمان لو ذكرت اسم المدينة أو المنطقة المعروفة اللي انت عايش فيها زي مثلاً مدينة نصر - القاهرة - مصر Nasr City, Cairo, Egypt، لأن ساعات مدة الـ Commute بيفرق في اختيار الشركات.

خبراتك السابقة

مهم تتكلم عن الشركات اللي انت اشتغلت فيها أو حتى كنت متدرب عندهم … ومهم كمان تذكر اشتغلت هناك من امتى لامتى في شكل بسيط زي من يوليو 2015 حتى أغسطس 2018 … ومهم جداً إنك تذكر حاجتين تانيين هانلمسهم في النقطتين اللي جايين.

التكنولوجي ستاك Tech Stack

مهم تقول إنت اشتغلت بأنهي مكتبات أو منصات أو قواعد بيانات الخ اللي انت اشتغلت بيها في الشركات دي … وتكون مختصرة على قد ما تقدر في الحاجات الرئيسية اللي استخدمتها بس وليك خبرة مباشرة معاها … في رأيي المتواضع، الاستاك اللي اشتغلت بيه في الشركات هي أهم حاجه في السي في بتاعك، لأنها بتبين بشكل كبير الممارسة الحقيقية بتاعتك كانت امتى وفي إيه ولمدة قد إيه، ودي معلومة في غاية الأهمية للي بيقرا السي في.

البزنس والمنتج

مهم جداً كمان انك تقول انت اشتغلت في الشركات دي ليه، يعني كنت بتبني معاهم منتجات ايه، وايه البزنس بتاعهم، وانت كنت في فريق ايه لو كانوا فرق كتير، التيم بتاعك كانوا مسؤولين عن ايه، وانت دورك ايه في التيم، شغالين اسكروم Scrum وللا بلدي، وهكذا … مهم للي بيقرأ السي في بتاعك يعرف انت خبراتك ايه في البزنس والـ Domains المختلفة.

المختصر المفيد

ممكن ترغي كتير في جزء خبراتك السابقة، بس يكون الأحسن إنك تكتب المختصر المفيد … الحاجات التانية اللي ليك خبرة فيها ممكن تكتبها بعد كده زي ما هانكمّل … حاول السي في بتاعك ما يزيدش عن صفحتين بفونت عادي، لو عرفت تلخّصه في صفحة واحدة يبقى أحسن وأحسن … لازم تفهم إن فيه ناس بتقرا عشرات السيفيهات كل يوم، وانت عاوز إن السي في بتاعك يكون سهل ليهم ويقدروا يوصلوا لكل معلومة هما بيدوروا عليها أسرع، هاتفرق كتير في فرصك.

الـ Hard Skills

مهم برضه تلخص أهم التكنولوجي والمكتبات والمنصات وقواعد البيانات والاستضافات والكلاود والخدمات الخ اللي ليك خبرة فيها … في قسم منفصل عن الشركات والخبرات السابقة، اعمل لستة بسيطة سهلة بكل الحاجات المهمة اللي انت اشتغلت بيها، سواء ذكرتها في السي في قبل كده أو لأ … وحط جمبيها تقييم Score شخصي منك عن قد ايه انت حاسس إنك محترف فيها، حاجه زي 3 من 5 أو 4 نجوم … أو تحط جمبيها اشتغلت بيها كام سنة … حاول تتجنب الاسهاب والتطويل، ومش كل مكتبة استخدمتها تكتبها، ركز على الحاجات المهمة واللي تعبّر عن كارييرك وتكمّل خبرتك وتجمّل سيفيهك.

المشاريع

ده قسم اختياري، لو تحب وفيه لسه مكان في السي في، ممكن تتكلم باستفاضة شوية عن مشاريع انت اشتغلت عليها … سواء كانت مشاريع جانبية أو في الشركات اللي انت اشتغلت فيها … مشاريع شخصية أو تخص الغير … أوبن سورس أو لأ … وماتنساش تركّز على الجوانب الفنية بالإضافة لجانب البزنس.

التعليم والكورسات

لو لسه فيه مكان في السي في -الصفحتين- ممكن تتكلم عن تعليمك والكورسات والشهادات اللي أخدتها … حسب الوظيفة طبعاً وكمان البلد اللي بتستهدفها، ممكن تكون الشهادات مهمة، أو لازم، إنها تتكتب … لغالبية المبرمجين مش مهمة أوي، وبالذات لو سنين الخبرة كتيرة لأنها بتبقى كفاية تبيّن خبرتك.

الهوايات والشغف

قسم تاني اختياري ولو لسه فيه مكان في السي في … هاتكتب هنا هواياتك وشغفك وعاوز تتعلم ايه، وممكن شوية عنك كانسان … شخصياً مش بحب القسم ده يبقى مكتوب، بافضل يكون منطوق من بقك لما حضرتك توصل إن شاء الله لانترفيو وتقدّم نفسك، الأبعاد الإنسانية بتبقى أحسن وش لوش.

الـ Referrals

أحياناً بينطلب إنك تمدّ الشركة ببيانات اتصال تخصّ الناس اللي انت اشتغلت معاهم في الشركات اللي حضرتك ذكرتها … في الحالة دي طبعاً ما تنساش تستأذن الناس دي الأول قبل ما تديها لمسؤول التوظيف أو HR أو الريكروتر Recruiter أو أياً كان مين مسؤول عن الوظيفة … وكمان تعرّفهم إن فيه احتمال حد يتصل بيهم ويسألهم عن تاريخك الوظيفي معاهم … الجزء ده كله أوبشنال وبيبقى بره السي في، بس قلت أذكره لأنه بيبقى من الحاجات المكتوبة اللي انت بتبعتها.

الـ Motivation Letter

كمان من الحاجات اللي بره السي في وممكن تطلب منك، هي رسالة الدافع Motivation Letter … ودي ممكن تبقى مطلوبة نصاً في الوظيفة أو إنت من نفسك ممكن تكتبها في الايميل اللي انت بتبعت فيه السي في … هي باختصار كام جملة بتقول فيهم انت بتقدّم ليه على الوظيفة دي بالتحديد، وعاوز تشتغل في الشركة دي ليه … ودي بتدي الشركة انطباع انك مش بتقدّم والسلام، لكن انت بحثت كويس عنهم وعن الوظيفة وحاسس إنها لايقه عليك سيكا.

النحو والصرف

لو السي في بالإنجليزي، ركّز أوي إن ما يبقاش فيه أخطاء إملائية Typos أو نحوية Grammer … واستخدم لغة سهلة مباشرة واضحة، وابعد عن التحوير الكتير … خد بالك كمان امتى تبقى الكلمة تبدأ بـ Capital وامتى Small، وامتى كام كلمة ورا بعض كلهم يبتدوا بـ Capital، وهكذا … الموضوع مهم لأنه هايديهم انطباع عن اتقانك للغة وبالذات لو بتقدم لشركة أجنبية … طبعاً تكون كمان كويس في الإنجليزي مش بس كتابة، لكن كمان نطق وسماع.

الاسهاب

وده بقى عكس اللي أنا قلته فوق عن الاختصار … استعمل الاسهاب لو كانت خبراتك قليلة ومش عارف تملى السي في … هنا بقى تحشي على قد ما تقدر، بس تكون في نفس الوقت حاجات ممكن تخلّيهم يفكّروا يعيّنوك، زي مثلاً انك شخص مجتهد وبتتعلم بسرعة … وفكك من البوقين الحمضانين بتوع انك بتشتغل تحت الضغط، وبتقدّس الحياة الشغلية، وعيبك الأساسي إنك شخص مثالي وبتنشد الكمال Perfectionist … لازم كمان أفكرك إنك تقدّم بس على الوظايف اللي تناسب خبراتك الحالية، يعني ما تبقاش الوظيفة عاوزه سينيور 10 سنين وانت جونيور وتروح مقدّم وأهو تجرّب حظك يمكن تيجي مع الهبل دوبل … بلاش تعمل كده.

ملف السي في

أحسن حاجه يبقى السي في بتاعك في صورة ملف pdf علشان بيشتغل عند كل الناس بغض النظر عن نظام التشغيل والبرامج الموجودة … تاني أفضل حاجه يكون docx -وورد حديث- … أنا للأسف في النقطة دي مذنب guilty والسي في بتاعي doc من أيام Office 2003 … كمان يكون أحسن لو اسم السي في بتاعك على اسمك، مثلاً mo_kinawy.pdf ، في حالتي mo_kinawy.doc

التحديث المستمر

ما تنساش كل فترة، كل سنة مثلاً، تبص على السي في بتاعك وتحدّثه أول بأول … الشركات اللي اشتغلت فيها، التكنولوجيز واللغات واللذي منه اللي اتعلمته أو اشتغلت بيه، المشاريع الجديدة وهكذا … وكمان بصّ على سيفيهات تانية وقارن الاستايل وطريقة الكتابة وشوف لو محتاج تعمل تغييرات … وخليّ عندك استراتيجية تسويق مستمرة لنفسك، مثلاً لو قدمّت في وظايف ومافيش رد، جرّب تغيّر استايل السي في والمحتوى بتاعه والملحقات التانية زي الـ Motivation Letter، خليك مرّن وup to date.

أخيراً

دي محاولة بسيطة مني إني أكتب بعض الملاحظات والنصايح فيما يخص السي في CV من واقع خبرتي ومن مناقشات كتيرة عملتها مع الجماعة بتوع التوظيف في الشركات … مهم جداً انك وانت بتكتب السي في، تحط نفسك مكان الشخص اللي على الناحية التانية من الشاشة وهو بيقرا سيفيهك، تخيّل هو هايقرا السي في بتاعك ازاي وهايشوفه ازاي وسط عشرات السيفيهات التانية … أتمنى لك كل التوفيق!