من أسبوعين عملنا انترفيو لوظيفة سينيور فولستاك ديفيلوبر Senior Full-Stack Developer والمرشح كان حد تركي مقيم في هولندا اسمه اوجور Uğur … اكتشفت أثناء المقابلة إن الـ ğ سايلانت silent والنطق الصح هايكون أوور - زي كلمة ساعة بالهولندي uur … المهم، ده ملخص المقابلة دي بالتحديد، وازاي بنعمل المقابلات عموماً في الشركة.

المقابلة الأولانية

الجماعة بتوع الـ HR بيتولوا نشر الوظيفة وقراية السيفيهات والمكالمات والإيميلات اللي في الأول، وهما اللي بيعملوا المقابلة الأولانية … طبعاً مع التواصل مع التيم زي ايه رأيكم في السي في ده وكدهون … في المقابلة الأولانية، بتوع الHR بيبصوا على كام نقطة زي مهارات التواصل وجودة اللغة ومدى ملائمة المرشح للوظيفة فنياً وثقافياً … أيوه مهم جداً إن المرشح يكون بيمتلك مهارات تخليه يقدر يندمج مع الشركة عموماً وثقافتها وتوجهاتها، بالإضافة إنه كمان يقدر يندمج مع التيم وينسجم معاهم.

ما ينفعش مثلاً يكون التيم بيعملوا أنشطة سوا وليهم طقوس خاصة مهمة بالنسبة لهم، والشخص الجديد ما يكونشي على نفس المستوى … مرحلة الـ Formation اللي بتحصل لأي تيم نتيجة تغيير أفراده، مرحلة مهمة، وبتبقى انتاجية الفريق في النازل لحد ما يخرجوا منها … وبالتالي تقليص المرحلة دي وتسهيلها بتكون أولوية للـ HR عشان ما يعملوش تعكير disturbance للتيم اللي ألريدي productive وبينتج.

في حالة أوور Uğur احنا بصينا على السي في بتاعه وعجبنا إن عنده خبرة كويسة، حوالي 10 سنين مع الدوت نت والجافاسكريبت … بس أنا لاحظت حاجه مهمة وهو إنه اشتغل كل حياته في تركيا ولسه واصل هولندا في أغسطس اللي فات، يعني بتاع 6 شهور في البلد وكلهم تقريباً شغل من البيت بسبب ظروف الكورونا … وناقشت ده مع التيم ومع مسؤولة الـ HR اللي هاتتكلم معاه … كانت وجهة نظري إنه احتمال كبير الانجليزي بتاعه يكون بعافية حبتين لأنه أكيد مش هايحتاجه وهو شغال عمره كله في بلده الأم في شركات كلها تقريباً تركية.

المقابلة التانية

بعد المقابلة الأولانية، بيبلغونا - التيم - باللي حصل في المقابلة الأولانية، ورأيهم في المرشح … وأحياناً بيبلغونا إنهم رفضوه أصلاً من المقابلة الأولانية لأسباب كتيرة، أشهرها مهارات التواصل واللغة، أقصد الإنجليزية طبعاً … في حالة أوور Uğur بالتحديد هما كانوا متخوفين برضه من موضوع اللغة، مش مقتنيعن 100%، بس لأنه كان مريض شوية يوم المقابلة افترضوا إنه ممكن المرض يكون مأثر عليه.

بعد تبليغنا، بنعمل كتيم ميعاد مع المرشح عشان نتكلم معاه ونتناقش في حاجات كتيرة، فنية وحياتية وكل حاجه تقريباً … احنا مش بندور على مبرمج/كودر والسلام، احنا عاوزين عضو وشريك في التيم، نتجانس مع بعض ونتفاعل ونتفاهم مع بعض، على مستوى جيد وعالي من العلاقات الإنسانية اللي بتبقى بين زمايل عمل بيقضوا مع بعض 8 ساعات كل يوم.

في المقابلة التانية، بنبتدي بالترحيب وكسر التوتر Ice Breaker وبنعمل جولة من التقديمات، كل واحد من الحاضرين بيقدّم نفسه ع السريع … العادي في المقابلة دي إن اتنين من التيم يكونوا حاضرين بالإضافة للمرشح، وطبعاً أعضاء الفريق هما اللي بيبتدوا بالتقديم وفي الآخر المرشح … اللي أعضاء الفريق بيحاولوا يعملوه في التقديم ده إنه يكون خفيف ولذيذ وبيحاول يتواصل مع الجانب الإنساني أكتر، حاجات زي أنا مبرمج بقالي كام سنة ومتجوز وعندي 3 أولاد كلهم ذكور وأصلاً من دولة كذا وعايش هنا بقالي كذا وساكن في الحتة الفلانية، نفسي أزور تركيا وبالذات اسطنبول، الخ

المهارات الفنية

وده بتبقى النص التاني من المقابلة التانية، بنشرح احنا تيم ايه وبنعمل ايه وأهميتنا ايه لبزنس الشركة … وممكن نعمل عرض بسيط للمنتج بتاعنا ونتكلم عن الفنيات اللي فيه … وبعد كده بتبقى اسئلة هات وخد من الطرفين، ومناقشات فنية بنحاول نعرف منها تاريخ المرشح وطموحاته وطريقته في التفكير والتعلم … أنا شخصياً مقتنع جداً إن كل شركة متفردة وليها الـ Tech Stack بتاعها، من منصات frameworks إلى مكتبات libraries إلى أسلوب عمل methodology إلى قرارات ومباديء وخطوط عريضة في التصميم والكلاود المعتمد وطرق الدخول والأمان المحددة الخ الخ الخ … كل شركة متفردة باسلوبها، وبالتالي بدل ما أدور على حد عارف الحاجات دي صم، بدور على حد تكون طريقة تفكيره جيدة وعنده حب للتعلم وشغف بالبرمجة … وده اللي بنحاول نعمله في المقابلات دي.

للأسف أحياناً المناقشات الفنية دي بتتقلب لصراع ديوك … اللي بيعمل المقابلة Interviewer أحياناً بيحس بعدم الأمان لما المرشّح تكون عنده خبرات أفضل، أو لما يقول رأي يعيب في منصة أو مكتبة أو ديساين معين، ساعتها اللي بيعمل المقابلة بيحس إنه اتهاجم شخصياً … حصلت لي شخصياً من كام سنة في انترفيو وكان بتاع الـ Architect فخور أوي إنهم عاملين كل حاجه Microservices على آزور Azure، وقلت له ليه تعملوا كده طالما إن كل العملاء بتوعكم أول عن آخر 1000 واحد وعمرهم ما هيزيدوا وكلهم عايشين في هولندا؟! … طبعاً الراجل وشه اتغير وانتوا بقى عارفين الباقي … هنا بتبتدي المناقشة تاخد منحنى تاني والاسئلة تتغير إلى اتجاه يخلي المقابل Interviewer يحس بالأمان أكتر عن طريق أسئلة تقريباً مالهاش أي علاقة بالوظيفة، غير بس الأمجاد الشخصية والانتقام … وكأن المقابلة ماكنتش على وظيفة معينة، لكن استعراض عضلات ومين أجمد من التاني … كلنا للأسف بنقع في الغلطة دي نتيجة حبنا للكود وفخرنا بوظايفنا وخبراتنا … كلنا بلا استثناء عندنا ضيق أفق Perspective وتحيز Bias حتى لو ادعينا غير كده.

اللي بنحاول نعمله وعشان نتجنب أي تحيزات، إننا نسأل أكتر أسئلة عامة من نوعية لو قابلك بج bug في الحتة الفلانية بتعمل ايه وبتعالجه ازاي؟ احكي لنا عن خاصية feature معينة انت بنيتها وكنت سعيد باللي عملته؟ تعمل ايه لو محتاج تتعلم حاجه جديدة؟ … يهمنا جداً إن الشخص الجديد يكون عنده شغف بالمجال وتفكير منطقي مرتّب وقدرة عالية على التعلم، مش بس سنين في صورة أرقام في السي في.

في حالة أوور Uğur، هو عنده خبرات كويسة بس مش كفاية قصاد اللي مطلوب في الشخص الجديد، بس هو مجتهد وعنده قابلية كويسة للتعلم، وأنا شخصياً كنت شايفه شخصية لطيفة وسهل التعامل والمعشر … لكن للأسف رفضناه لأن زي ما كنت خايف من الأول، فعلاً التواصل معاه كان صعب، والانجليزي بتاعه مش قد كده.

ما بعد المقابلة

بعد المقابلة التانية وفي حالة الرفض، بيتبعت ايميل للمتقدّم بيتقال له بالظبط ايه الحاجات اللي عجبتنا وإيه المشاكل اللي احنا شايفينها وبالتالي سبب الرفض… ولو حصل قبول بيبقى فاضل بس بعض التفاصيل الصغيرة زي الاتفاق على المرتب وامتى يبتدي وباقي بنود العقد، ودي أمور بيتولاها الجماعة بتوع الـ HR والحسابات.

لو كله تمام والعقد اتمضى، بيبتدي مسؤولي الـ Onboarding، ودول ناس من أقسام مختلفة، بيبتدوا بعمل الحاجات اللازمة زي إنشاء بريد وحساب ليه، تجهيز وشراء أي معدات لازمة زي اللابتوب والماوس والموبايل، حجز أي حسابات أو اشتراكات مطلوبة زي Visual Studio Subscription، يدّوا حسابه الصلاحيات اللازمة، وهكذا … بحيث يجي أول يوم عمل ليه يلاقي كل حاجه جاهزة ويبقى فاضل بس منه إنه يغير الباسووردات ويسطب البرامج اللي هايحتاجها … ويقعد معانا كام اجتماع نحطه على الطريق ونشرح له احنا بنشتغل ازاي بصورة تفصيلية.

الخلاصة

دي باختصار دورة المقابلات والتعيين، ولو ركزت كويس في اللي فات هاتلاقي إن الـ Soft Skills مهمة جداً جداً جداً … أنا مش ببطل أكرر وأقول قد إيه مهارات التواصل واللغة مهمة، خبراتك والـ Hard Skills مهمة طبعاً وهي اللي هاتفتح لك الباب، بس مش هاتعرف تعدي من الباب وتكمل في أي حتة وأي اتجاه غير لما تبقى كويس في الجوانب التانية، اللي للأسف مش بنبقى واخدين بالنا منها وبنفتكرها متأخر … اللغة يا أحباب، اللغة يا أهل الخير.

أخيراً، لو انت شايف إنك مؤهل للشغل في الشركة اللي أنا فيها، خد لك لفة على الوظايف هنا:
https://www.workingatvanlanschotkempen.com
حالياً محتاجين مبرمجين دوت نت وأنجلار Angular … ومبرمجين أندرويد، ودي بالذات بقالهم كتير بيدوروا على تنين أندرويد ومش لاقيين … خد لك لفة وقدّم لو عندك المهارات اللازمة - Soft + Hard Skills … الشركة بتعمل Visa Sponsorship للي فعلا يستحق التعب.