بقالي كام سنة عامل استضافة لمدونتي mkinawy.com على ووردبريس wordpress.com … والحقيقة مش مبسوط معاهم، من ناحية ووردبريس ذات نفسه مش مرن كفاية ليا، وكل بلجن محترم لازم له اشتراك، غير تكلفة الاستضافة نفسها وخطة الاشتراك في wordpress.com عشان يشيلوا الاعلانات، والأداء في الآخر مش أحسن حاجه … وأنا مدونتي مش هادف منها لأي ربح أصلاً، فتقليل التكاليف أولوية عندي.

بصيت على الاختيارات البديلة، ولقيت أحسن حاجه إني أعمل استضافة لمدونتي على صفحات جيتهوب Gtihub Pages وأحول مدونتي لصفحات static عن طريق جيكل Jekyll، وده اللي مايعرفهوش هو أداة مجانية أوبن سورس مبنية بلغة روبي Ruby لتحويل المحتوى بتاعك، اللي بيبقى في الغالب في شكل ملفات html + css + markdown .md، إلى موقع كامل من ملفات html … وبالتالي مافيش داتابيز database ولا يحزنون، وبالتالي أداء عالي.

جيكل Jekyll ليه دعم كبير للSEO، الكور تيم عاملين بلجنز مخصوص للتاجز tags وخريطة الموقع sitemap والفييد RSS feed … غير البلجنز التانية الكتيرة اللي المساهمين contributors عاملينها واللي بتغطي تقريباً كل احتياجاتك … وفيه كمان بلجنز مخصوص ممكن تساعدك في التحويل من ووردبريس إلى جيكل لو عاوز تنجز وعندك مدونة كبيرة.

صفحات جيتهوب Github Pages بتدعم جيكل دعم كامل وكمان بتنصح بيه، وفوق ده الاستضافة عليها ببلاش بشرط إنك مش تستخدم موقعك أو مدونتك لأغراض تجارية … وكمان ممكن تربط صفحتك بدومين domain يخصك … ولو مافيش دومين مافيش مشكلة، هايبقى لنك الصفحة بتاعتك على شكل https://username.github.io … والموضوع بسيط جداً، انت بس محتاج تحط ملفات موقعك، أو ملفات مشروع جيكل Jekyll لو هاتستخدمه، على جيتهوب ريبو Github repository تكون رابطه على الصفحة، ومع كل تعديل تعمل git push وبس، Github هايتولى الباقي.

يعني لو عندك خلفية عن html + css + markdown + git، الموضوع هايبقى سهل جداً، أو لو احتجت تتعلمهم الموضوع مش هايبقى صعب … وفيه مصادر كتير أونلاين ومقالات كتير بتشرح لك كل كبيرة وصغيرة، وبحث بسيط على جوجل على أي مشكلة تقابلك هاتلاقي أجوبة بالعبيط … وهاتلاقي كمان ثيمات مميزة كتيرة وبالمجان وأصحابها عاملين شرح ممتاز ازاي تستخدمها وازاي تدمجها.

طيب وبالنسبة للحاجات في الموقع أو المدونة اللي لازم تكون دايناميك dynamic؟ زي مثلاً القوائم البريدية والتعليقات واتصل بنا؟ … الحاجات دي سهل جداً تدمجها في الموقع عن طريق جافاسكريبت Javascript بتاع خدمات خارجية 3rd party زي مثلاً Disqus وMailchimp وGoogle Analytics وغيرهم كتير … وبعضهم بالمجان وكتير ليه خطة اشتراك مجانية … والنت مليان شرح ازاي تستخدمهم جوا جيكل Jekyll وإيه أفضل البدايل.

أكتر حاجه اتعلمت منها الجيكل Jekyll بسرعة هو الشرح tutorials بتاعهم، مترتب وسهل الفهم وبيشرح كل الحاجات المهمة … أنصحكم تاخدوا لكم لفه فيه وتجربوا، هاتستمتعوا كتير.

لنك الشرح: https://jekyllrb.com/tutorials/home
صفحات جيتهوب: https://pages.github.com